香港蘋果
【韓流】發福高雅娜谷新劇 宋承憲演地獄使者:同《鬼怪》完全唔同 1,815
建立時間 (HKT): 1011 17:15
適中字型較大字型
現年41歲男星宋承憲今年活躍於公仔箱,年初與「大長今」李英愛合作劇集《師任堂,光的日記》,之後與27歲女星高雅娜合作OCN新劇《Black》,並於劇中飾演地獄使者一角。
由於年初tvN劇集《鬼怪》熱爆亞洲,當中男星李棟旭喺《鬼怪》亦係扮演地獄使者,外界早已經將兩者比較,加上宋承憲與高雅娜年齡差距甚遠,有唔少網民批評唔襯,未知會否影響到劇集收視?
《Black》將於本周六首播,宋承憲、高雅娜、「三神奶奶」李伊、男團帝國之子成員金桐俊等主演現身劇集發佈會,為配合劇名4位主演都以黑色打扮示人,不過高雅娜自去年拍攝劇集《花郎》後甚少公開露面,似乎休息期間胃口不錯,今日現身時身型顯得發福咗少少,而且化咗濃妝嘅關係,反而顯得比35歲嘅李伊更成熟。
而宋承憲喺發佈會上亦大方提到《鬼怪》李棟旭嘅地獄使者一角,表示:「我都知有好多人會比較,但因為劇集種類唔同,所以內容、故事發展都唔一樣,與《鬼怪》中嘅地獄使者一角完全唔同。」提到兩位主角年紀相差14歲,高雅娜表示唔覺有代溝,又大讚宋承憲好照顧佢,而金桐俊就踢爆宋承憲鍾意喺片場聽女歌手IU嘅歌曲。