□Pippo阮
清明过后,初夏又至。广东呢个时候嘅天气潮湿闷热,令人烦恼嘅蚊螆(亦称蚊螆仔、蚊仔、蚊子)将纷纷出动。世人钟意将蚊嘅各个部位斩件,用嚟形容极小、细微。如明朝魏学洢《核舟记》有“细若蚊足”；此外重有蚊首、蚊睫、蚊眉等都系指极细小之物。
粤语入面关于蚊嘅歇后语好有趣,例如:跑马射蚊须——机会渺茫。头先讲过,蚊脚都已经够细,更何况系蚊须。唔单止噉,重要骑住马,跑住用人手拉弓嚟射,成功嘅机会梗系渺茫啦。只系五个字嘅歇后语,就用咗五层(骑马、飞奔、弓射、蚊螆、胡须)递进嚟形容成功率,够晒简洁生动,感觉直接跃然于听者脑中。
另有“大炮打蚊螆——小题大作”。顾名思义,毋须多解。令人谂起清朝常见嘅文字狱,好多都系当权者小题大造,兴师动众。如胡中藻《坚磨生诗钞》案,胡因得罪乾隆,畀乾隆煮重佢米,喺佢嘅诗集中深文周纳,罗织罪名。好似“一把心肠论浊清”噉嘅诗句都可以被砌成对大清帝国嘅侮辱,跟住明正典刑昭罪天下,呢种大炮打蚊螆式嘅文字狱对中国嘅思想文化发展系一场巨大嘅灾难。
蚊螆虽然系害虫,但亦同美食有啲关系。粤菜有款豆腐羹,叫“蚊螆豆腐”。《美味求真》古菜谱有“蚊螆豆腐”之条:“白豆腐去皮切幼加火腿粒上汤滚之加纤头上碗夹加鲜虾米切幼同滚亦佳味香滑。”据讲“蚊螆豆腐”其实就系淮扬名菜入面嘅“文思豆腐”。相传系乾隆年间扬州由僧人文思和尚所创,初始版本为斋菜,以素汤作底,配料系香蕈、鲜笋、青蔬、木耳、金针之类,因受乾隆赏识收入御膳房菜谱而声名大噪。后来扬州厨师用荤汤火腿烩豆腐丝亦打住“文思豆腐”嘅招牌成为广为流传嘅淮扬名菜。个菜嚟到广东后,因当时南粤厨人唔识淮扬方言,亦未通文墨,可能误将外江话“文思”当作“蚊螆”,僧人南下变成咗蚊螆,听落几好笑,但又可以接受喔。