鍾嘉欣戲癮起想拍劇
王君馨今日同圈外男友Daniel喺香港美國會搞婚禮,伴娘鍾嘉欣就話本身出席唔到呢個婚禮,不過咁啱有工作可以留喺香港,先可以出席到。問到有冇送啲咩畀新人,佢就話:「送咗最實際嘅人情,對新婚夫婦嚟講,送人情就最實際,今次係開party嘅形式,之前喺外國都有送表演畀佢哋,所以今日就冇喇。」
鍾嘉欣都認識新郎哥,佢覺得兩個係好襯,祝佢哋幸福快樂。問到老公有冇嚟,佢就話:「老公冇返嚟,但有帶囡囡返嚟,不過冇帶佢嚟婚禮,唔係太方便。」
講到係唔係會拍劇,佢就話:「其實都係傾緊,公司有搵過我,依家睇下就唔就到,我都希望成事,我都有戲癮。但就未必可以喺香港拍,喺加拿大嘅話就得喇,因為囡囡同老公係最重要,喺加拿大拍可以就到佢哋。」鍾嘉欣仲話年尾就會約滿無綫。

