江華、陳玉蓮同羅蘭等,今日喺灣仔出席星級導師計劃啟動禮,原來江華依家同太太麥潔文籌辦兒童演藝訓練課程,佢話:「搵4至17歲嘅小朋友參加,我哋一齊做,佢教唱歌我教演戲,11月尾開班,呢啲要從少教,訓練專注、相處、溝通、合群同自律。o依家人好多憂慮,乜都貴,讀書求高分,好多時讀書學懂禮貌,呢個興趣係要培養。」
依家至於會否考慮復出?江華就話:「冇細諗,太辛苦嘞。」見江華好似消瘦不少,佢就話:「嗰時肥啫,屈指一算已經淡出超過10年,生活節奏正常好多,比較注重起居飲食。」
另外,近年主力喺大陸搞慈善工作嘅蓮妹,下星期就會去西藏青海幾個月,主要係帶養女探家人,為怕高山症狀,蓮妹話有人送咗個氧氣枕頭畀佢瞓覺用。佢仲透露有好多製作人都想搵佢合作,每個月都有睇劇本,有啱嘅都會拍。
一直以來,好多人都話江華同劉德華好似樣,今日江華同「姑姑」陳玉蓮一齊出席活動,當呢個華仔同姑姑合照時,驟眼就係以為現代版嘅楊過終於同小龍女重逢。
你分到嗎? 江華今日出席星級導師計劃啟動禮。(攝影:陳順禎) 陳玉蓮
江華驟眼望落好似華仔,同蓮妹合照,真係好似姑姑同過兒。