楊怡同羅仲謙下個月二號喺香港大排筵席，最近佢兩個都好忙，咪就係要忙住搞婚宴嘅事囉！上個星期五，佢哋依照傳統過大禮，而喺圍村長大嘅謙謙特別注重傳統，除咗嫁喜餅係由奇華贊助，其他過大禮嘅鮑魚、海味、金器、紅酒都係由謙謙準備，外母見到一定笑到四萬咁嘅口喇！ 當日阿怡喺屋企等未來老公謙謙「過大禮」，阿怡仲親自裝飾屋企，成家人都懷住興奮嘅心情陪阿怡迎接「過大禮」。阿怡依照傳統習俗，喺「過大禮」其間，一直留喺房入面，屋企人接過大禮，阿怡一開門見到成座山嘅禮品，開心又感動，仲笑笑口話自己終於嫁得出。 另外，阿怡同謙謙因為好忙，所以最近都冇更新Instagram，噚日一更新就即刻「放閃」，其實阿怡同謙謙都係八月生日，生日日子仲只係相距四日，阿怡就貼咗張錫錫謙謙嘅蛋糕相，唔少人留言祝賀，「好sweet....閃爆，祝阿怡謙仔永遠都咁恩愛」，仲有人大讚素顏楊怡唔化妝仲後生。